Denne torsdagskvelden på handelshuset vart eit utstillingsvindauge for medverknadsprosjektet «Jakta på stjernene». 

Kaja, Tori og Sofie frå Førde vgs sin samfunnsgeografi-klasse var tydelege røyster for ungdomen denne kvelden. Tema frå elevoppgåva som vart presentert var: Korleis kan Førde bli ein meir spennande by for ungdomen? Korleis kan Førde by bli meir berekraftig? 

Ungdomane sitt innlegg skapte mykje diskusjon kring behov for hybelhus, møteplassar for ungdom og gunstigare prisar for å kunne velje buss. 

At mikrofonen var open på slutten av denne bylaben fungerte godt og kvelden utvikla seg til «speakers corner». Deltakarane fekk fronta sine saker i høve utvikling av Førde sentrum.

Ordføraren var tilstades heile kvelden for å kunne svare ut det som rører seg politisk.

Plansjefen kunne svare ut kvifor Førdehuset ikkje er innlemma i planavgrensinga for sentrumsplanen

Landabrygga som prosjekt vart løfta fram frå fleire i salen. Vi fekk ei glimrande innføring i historia kring Landabrygga frå Arne Aasland (eit vandrande leksikon i Førde si historiske utvikling). Ei sentral problemstilling vert å kunne synleggjere historia og Landabrygga i planane for nytt uteområde for Førde ungdomsskule.

Det er også ei gruppe som engasjerer seg spesielt for å utvikle ein «kulturakse» i området Storehagen - Førdehuset. Dette vert spelt inn til områdereguelringsplanen.

 I tillegg fekk forsamlinga følgande spørsmål som vart svara ut i Teams-kanalen:

1.    Kva forventingar har du til sentrumsplanen?

2.    Har du innspel til tema som du ønsker å diskutere i gjestebod eller verkstad i Bylab?

Det vart i avsluttande ord frå ordførar oppfordra til å delta aktivt i forbetring av Førde sentrum. Den gode dugnadsånda som vi ser resultat av frå Bymarkas venner bør vere mogeleg å overføre til «Byens venner».

Vi håpar at denne vandrande Bylab’en kan vere ein viktig arena for innbyggarane til å skape draumar og visjonar for Førde si framtid. Det kan også gro fram  fellesskap som kan gje grunnlag for auka dugnadsinnsats og gjennomføring av felles mål.

Program 

• Opning av Byalab ved ordførar, Jenny Følling
• Sentrumsplan Førde
• Utstilling av funn frå “Jakta på stjernene”
• Ungdomsbyen
• Nærmiljøhagen
• Bylab og gjestebod som medverkandsprosessar
• Open mikrofon