Nærmiljøråda, kommunen og folket
I alle møta vil nærmiljøråda presentere kva dei er spesielt opptatt av i sitt område. Planavdelinga i kommunen har hatt kort innlegg om arealplanen. Det har blitt sett av god tid til spørsmål og diskusjonar. Takhøgda er god, så vi i kommunen har fått innblikk i både frustrasjonar og framtidsvyer. Svært gjevande!
Det er særs interessant og kjekt for både ordførar og kommunedirektør å møte flest mogeleg der folk bur. Begge forsøker å delta på alle åtte møta.
Aktuelle planar i lokalsamfunnet
I Bygstad vart det òg orientert om fylkesveg 57. Det gjorde sjølvsagt også til at mange deltok. NVE orienterte på møte i Viksdalen om ein rapport Multiconsult har gjort om flaumfare i Gaularvassdraget og korleis ein kan møte dette. Dette var òg naturleg nok særs relevant for alle som bur i området. Vi håpar at områdeplan for Vevring sentrum blir eit tema som engasjerer på møte i Vevring.
Vindkraft er også eit stort tema. Vi ønsker å invitere til eige folkemøte om dette i mars.
Kva skal Sunnfjord kommune vere?
Samfunnsdelen til kommuneplanen har føringar for samfunnsutvikling og arealplanen. Sunnfjord kommune sin ambisjon er å vekse og utvikle seg på ein berekraftig og livskraftig måte. For å få ei god utvikling i Sunnfjord, må vi samarbeide!
Sunnfjordingane har kome med sine innspel
Heile 260 arealinnspel er blitt vurdert. Sunnfjordingen bryr seg openbart og heldigvis om korleis dei ulike areala i kommunen kan bli brukt. Dette er både kjekt, men også heilt avgjerande for eit sunt og levande lokaldemokrati.
I det vidare silingsarbeidet har kommunen prioritert dei innspela som er mest realistiske og i tråd med vedtatt samfunnsdel. Å ta heile kommunen i bruk er svært sentralt! Vi har derfor sett på senterstruktur, og ønsker å styrke utvalde senter for eit større omland. Vi har også sett på terskel for å kunne få i gong utvalde tiltak utanfor sentera.
Oppmoding
Kom på dei folkemøta som er planlagt. Vi håpar å sjå deg, og at du får høve til å delta i debatten.
Planen er ute på høyring til 28. februar – send gjerne dine merknadar.
Aktuelle lenker
Sunnfjord kommune