Sunnfjord er i vekst. For å sikre gode kvardagsliv og utvikle kommunen som regionmotor, må arealbruken ha tydeleg og heilskapleg styring.

Overordna prinsipp

Det er eit mål at arealutviklinga er klimavenleg, trygg, berekraftig, og bidreg til arealnøytralitet. Vi skal bruke areala betre ved gjenbruk og fortetting i sentrum og senterområda, og sørgje for god tilgang til kollektivtransport, natur og tenester. Naturmangfald, jordvern og samfunnstryggleik er grunnleggjande omsyn. Vi skal ta heile kommunen i bruk.

Berekraftig areal- og transportutvikling

• Vi samordnar bustad-, areal- og transportplanlegging for å redusere transportbehovet og styrkje kollektivtilbod, gang og sykkel
• Utbygging skal prioriterast i sentrum og senterområda, der eksisterande infrastruktur kan nyttast
• Nye område skal lokaliserast utanfor flaum-, skred- og erosjonsfare og bidra til klima- og arealnøytral utvikling

Næringsutvikling

• Plasskrevjande næring bør lokaliserast til dei etablerte næringsklyngene
• Næringsutvikling i heile kommunen er velkomen
• Samfunnsnyttig bruk av overskotsmassar frå vegprosjekt, tildømes til jordforbetring og rassikring

Bustadutvikling og gode bumiljø

• Ny bustadutvikling bør skje i og rundt senterområda for å sikre nærleik til tenester, trygge nærmiljø og korte kvardagsreiser
• Spreidd bustadbygging i LNF-område skal vere eit supplement der det styrkjer eksisterande grender og ivaretek omsyn til jordvern, naturmangfald og tryggleik
• Fritidsbustader bør som hovudregel utviklast ved fortetting i etablerte område. Nye hyttefelt kan vurderast i områder som vert tilrettelagt for fritidsbruk, reiseliv og naturopplevingar

Klima, natur, kulturmiljø og samfunnstryggleik

• Utbygging skal tilpassast klimaendringar, unngå risikoområde og bør i størst mogleg grad ta vare på naturmangfald, karbonrike areal, kantsoner og kulturmiljø
• Arealrekneskap er eit hjelpemiddel for å redusere nedbygging av dyrka mark og verdifull natur

Senterstruktur og Førde som regionmotor

• Førde sentrum skal ha særlege vekstvilkår, med besøksintensive tenester og byfunksjonar
• Byutviklinga skal gjere sentrum meir gang- og sykkelvenleg, utvikle gode møteplassar og redusere bakkeparkering til fordel for grøne byrom
• Senterområda skal vere naturlege knutepunkt i sine omland og styrke lokalsamfunna