Du kan bygge, endre eller rive garasje, uthus, hobbybod eller liknande inntil 50 m2 utan å søke. Du kan og bygge eit enkelt tilbygg som veranda på maksimalt 15 m2. Dette er tiltak som er unnateke søknadsplikta etter forskrift om byggesak SAK10 § 4-1.
Dette må vere i orden
Før du kan begynne å bygge, endre eller rive utan å søke må du kontrollere om det du skal gjere oppfyller alle krav og føresegner for å vere unnateke søknadsplikt.
- Det du skal bygge må vere i samsvar med gjeldande planføresegner for din eigedom. Finn kva som gjeld for din eigedom på Finn planar. Det må vere i samsvar med planføremål, utnyttingsgrad, byggegrenser, avstandsreglar, høgdereglar, krav til utforming osv.
- Etter plan- og bygningslova § 1-8 kan du ikkje bygge nærare sjø enn 100 meter frå strandlina. Det kan vere at arealplanen for din eigedom har andre reglar. Det kan vere byggegrense til vassdrag i arealplanen.
- Dersom det du skal bygge ikkje er i samsvar med planen for området, kan du søke om dispensasjon. Dersom du får innvilga dispensasjon kan du utføre byggearbeidet utan å søke. Meir informasjon om dispensasjon finn du under Dispensasjon.
- Det kan vere du treng løyve eller samtykke frå andre styresmakter. Det kan vere landbruksstyresmakta, vegstyremakta, kulturminnestyresmakta m.m.
Frittliggande bygning som garasje og uthus
For at du skal kunne bygge utan å søke må alle vilkåra under vere oppfylt. Om eit eller fleire vilkår ikkje er oppfylt må du søke om byggeløyve.
- Bygningen er frittliggande
- Bygningen blir plassert på bebygd eigedom (småhus)
- Bruksareal eller bebygd areal ikkje overskrid 50 m2
- Bygningen skal ikkje innreiast for varig opphald (ikkje overnatting)
- Mønehøgda ikkje overskrid 4,0 meter
- Gesimshøgda ikkje overskrid 3,0 meter
- Bygningen blir oppført i ein etasje og utan kjellar
- Bygningen ikkje blir plassert nærare enn 1 meter frå nabogrensa
- Bygningen ikkje blir plassert nærare enn 1 meter frå anna bygningen på same eigedom
- Bygningen ikkje blir plassert over vass- og avlaupsleidningar
Tillatt bruk
Bygningen skal ikkje kunne bli brukt til varig opphald eller bebuelse. Det betyr at bygningen ikkje kan innehalde kjøkken, stue, soverom eller våtrom. Bygningen kan bli brukt til bod, veksthus, søppelskur, garasje, carport, vedbod og dukkehus.
For mindre tilbygg til eksisterande bygning
Du treng ikkje å søke om å sette opp tilbygg så lenge det
- Ikkje kjem i konflikt med arealplan, planføremål, plankart eller andre føresegner som byggegrenser, avstandskrav og utnyttingsgrad på eigedomen
- Tilbygget har eit bruksareal (BRA) eller bebygd areal (BYA) som ikkje er over 15 m2
- Knytt seg til maksimalt to etasjar eller plan på den eksisterande bygningen
- Avstand til nabogrense må vere minst 4 meter (dersom ikkje anna grense i plan)
- Det samla arealet på den frittliggande bygningen kan ikkje overstige 50 m2 (garasjar utan søknadsplikt osv).
Eksempel: rom for varig opphald (som kjøkken, stue, soverom eller våtrom), understøtta veranda, opent overbygd inngangsparti, andre enkle takoverbygg med understøtting, søppelskur, ved- eller sykkelbod
Tillat bruk på tilbygg unnateke søknadsplikt:
Dersom det ikkje står noko særskild om det i arealplan, kan tilbygg til bustad vere kjøkken, stue, soverom eller våtrom.
Eit tilbygg etter unntaket kan ikkje føre til at det godkjente føremålet med bygningen blir endra. Inneheld bygningen berre tilleggsdel frå før, kan den berre bli utvida med tilleggsdel. Ein garasje kan bli utvida med bod, men ikkje med eit soverom til dømes. Tilbygget kan heller ikkje innehalde ein eigen sjølvstendig bueining, eller på anna måte føre til at det blir oppretta ei ny bueining utan søknad.
Nabovarsling
For byggearbeid som er unnateke søknadsplikt er det ikkje krav om nabovarsling etter plan- og bygningslova. Vi oppmodar likevel at du tar kontakt med naboar og informerer dei om dine byggeplanar. Dersom du må søke dispensasjon må du sende nabovarsel.