Fredag 27. september

Det skal bryggast, bakast og slaktast.  Hoggast og kokast, syast og pyntast.

Heile Ålhus vert kledd i festskrud til jubileumsfeiringa siste helga i september, det vert folkefest for landslova etter Magnus Lagabøte 27. - 29. september 2024.

Feiringa på Ålhus byrjar alt fredag formiddag med fagdag om lova si historie og kor viktig ho har vore og framleis er. Mellom innleiarane er den omtykte formidlaren og rettshistorikaren Jørn Øyrehaug Sunde.

Til den høgtidelege festopninga fredag kveld hentar vi over to hundre kostymer frå spelet om Audun Hugleiksson ned frå loftet på Eikåsgalleriet og kler oss i middelalder-drakt.

Fleire av kunstnarane frå spelet vil delta i programmet på opningsfesten og tonefølge vil vere ved Henning Sommerro.

Laurdag 28. september

Laurdag gjer vi klart for marknadsdag ved Eikåsgalleriet.

Bønder og handverkarar kjem til marknaden med varene sine, det blir leik og moro, handel og prat. Øksekasting kan og vere mellom aktivitetane.

Kyrkjekonsert i Ålhus kyrkje og matgilde i Borgja er programpunkt på ettermiddagen og kvelden.

Søndag 29. september

Søndag byr vi inn til høgtidsgudsteneste med biskop-besøk, snorklypping av den nye kulturminneløypa og hagefest i Prestegardshagen.

Både gjennom folkefesten på Ålhus og jubileumsprogram elles i året vil vi utforske middelalderhistoria vår og reflektere over korleis vi tek vare på og vidarefører verdiane lova bygger på. Skulane og biblioteka våre, lag og organisasjonar og kulturlivet elles vil bli involvert i fleire program og tilbod. Men allereie no vil vi oppmode om å sette av siste helga i september for ein rikholdig jubileumsfest på vår eigen tusenårsstad i Ålhus!