For over hundre år sidan bygde eit kunstnarpar ein heim som har trekt hundretusenvis av gjestar. I framtida ynskjer vi å ta i mot betre, inkludere fleire og utvide opplevinga av staden -  velkomen til Astruptunet og vårt nye visningssenter!

Vi tilrettelegg for fleire publikumsgrupper som vert tekne imot i vårt nye visningssenter ved sidan av kunstnarheimen. Bygget innheld moderne fasilitetar for publikumsmottak med utstillingslokale, kafe, toalett og heis. Her kan publikum byrje- eller avrunde besøket i Astruptunet med utsyn over Jølstravatnet i kafeen, kunst i verdsklasse, lokal mat og drikke med innslag frå kunstnarhagen. 

Den viktigaste oppgåva til et framtidig visingssenter, er å skåne kulturminnet Astruptunet med bygningar og gardshage for slitasje ved aukande besøk. Bygget vil samstundes gje optimale høve for dei utstilte kunstverka av Nikolai og Engel Astrup. Bygget vil ligge i gangavstand med tunet, for å sikre at samhandlinga med både kunstnarheim, hage og friluftsareal er så god som mogeleg. Publikum kan bevege seg langs Fylkesvegen, eller i nettverk av stiar. 

Bygget skal også vere ein fleirbruksarena. Vi skal ta i mot barn og ungdom til kreative verkstadar, og vi skal legge til rette for arrangement i stor og liten skala. Visningssenteret skal inspirere og begeistre – publikum skal kjenne seg godt mottekne, slik Engel Astrup tok i mot folk medan ho levde i Astruptunet. 

I vårt visningssenter skal gjenklangen av Engel og Nikolai sine livsforteljingar lære komande generasjonar om natur, kunst, tradisjonshandverk, hagebruk og sjølvberging.
 

Astruptunet er familieheimen til kunstnarparet Nikolai (1880-1928) og Engel Astrup (1892-1966). Etter at dei to kjøpte staden i 1912, starta dei forvandlinga av eit bratt og ugjestmildt gardstun. For dei to blei dette både familieheim, gard med husdyrhald, hage med nyttevekstar og ein stad for kreative skaparevner. Staden blei raskt populær og tok nysgjerrige tilreisande innom tunet allereie i Nikolai Astrup si levetid.
 
I dag står staden fram som eit Norges mest ambisiøse kunstnarprosjekt, med hundrevis av planter, frukttre og blomar som omkransar eit gardstun med tradisjonsbygg frå Jølster. Astruptunet står no fram i ny drakt, etter fleire år med restaurering og oppgradering av både landskap- og byggmasse. Sommaren 2024 sto HMS Dronninga for den formelle nyopninga av Astruptunet.

• Les meir om opninga av Astruptundet
• Les meir om restaurering av hagen og tunet
• Sjå Astruptunet si nettside
   

Nikolai Astrup sitt kunstnarskap er folkekjært, samstundes som det framleis er banebrytande. Kombinasjonen sett kunstnaren i ein unik posisjon. Astrups kunst har dei seinare år blitt vist på ei rekkje renommerte visingsstadar i England, Tyskland, Sverige og USA. Måleri, tresnitt, trykkplater og teikningar har blitt mottekne av publikum og kritikarar på best mogeleg vis. 

Svært høge besøkstal og gjennomgåande rosande omtale frå kjende kunstkritikarar, har gjort Nikolai Astrup sine kunstverk kjende for eit langt større publikum enn tidlegare. I 2026 skal 4 museum i Japan vise Astrup-kunsten for eit nytt og nysgjerrig publikum. 

Engel Astrup tok hand om staden ved ektemannens død. Ho overlevde mannen med 38 år, og gjennom desse åra dreiv ho staden i den ånda dei begge hadde lagt over tunet. Alle var velkomne og alle blei sett. Engel Astrup var kunstnar, og etter å ha lært trykketeknikkar av mannen, sto ho eigenhendig for produksjon av bunadsforkle, dukar og gardiner. Engel Astrup deltok på fleire utstillingar, mellom anna i Bergen Kunstforening.