Bakgrunn for saka

• I september 2022 vedtok kommunestyret Bustadsosial handlingsplan 2022–2030 som fastset behov for 70 nye demensvennlege institusjonsplassar fram mot 2030–2040.
• I september 2024 vedtok kommunestyret at tomta ved Førde barneskule blir valt som tomt for nytt omsorgssenter i Førde. 
• I april 2024 vedtok formannskapet at kommunedirektøren skulle greie ut tilbygg ved dagens omsorgssenter som eit alternativ. Dei folkevalde ville vere trygge på å velje alternativet som er mest gunstig økonomisk både når det gjeld investering, livsløpskostnad og drift av institusjonen.
• I oktober 2025 fekk formannskapet og utvalet for helse og omsorg presentert LINK Arkitektur si moglegheitsanalyse for tilbygg ved dagens omsorgssenter.  Dei fekk òg den kommunale arbeidsgruppa si førebelse vurdering. 
• No blir saka lagt fram for avgjerd i kommunestyret 26. februar. 

Viktige dokument

• LINK Arkitektur sin moglegheitsstudie om tilbygg ved Førde omsorgssenter
• Ny institusjon i Førde – Oppfølging av moglegheitsstudien
• Saksutgreiing og andre dokument 

Vurdering av alternativa 

1. Tilbygg ved Førde omsorgssenter 

• Teknisk mogleg, men krev riving av eksisterande bygg og tap av omsorgsbustader.
• Gir høg byggeteknisk risiko, meir kompleks byggeprosess og større driftsforstyrringar.
• Mindre eigna for demensvenleg utforming og vidare utvikling.
• Trinnvis utbygging er lite føremålstenleg.

2. Nybygg på tomta til Førde barneskule

• Gir betre høve for oversiktleg og demensvennleg institusjon.
• Meir fleksibel løysing med betre uteareal og samlokalisering av støttefunksjonar.
• Lågare risiko, meir føreseielege kostnader og mindre påverknad på drift.
• Godt tilrettelagt for framtidig og trinnvis utbygging.

Samla vurdering

Barneskuletomta gir best grunnlag for eit funksjonelt, berekraftig og framtidsretta omsorgstilbod. Tilbyggsalternativet er vurdert som meir komplekst, dyrare over tid og mindre eigna.

Kommunedirektøren si tilråding

Sunnfjord kommunestyre vedtek at ny institusjon i Førde skal lokaliserast på tomta til Førde barneskule, i tråd med vedtak i sak KST 085/24 og vurderingane i denne saka. 

Planlegginga skal ta utgangspunkt i eit nytt, demensvennleg institusjonsbygg med 70 plassar og naudsynte støttefunksjonar, med moglegheit for trinnvis utbygging ved behov. 

Behovsanalysen og resultatet av prosjektet «Kvalitet og kapasitet i helse og omsorg 2026 – 2040» skal takast omsyn til når det gjeld innhald, omfang og funksjonar i den nye institusjonen. 

Kommunedirektøren får fullmakt til å starte arbeid med reguleringsplan for barneskule­tomta og eksisterande omsorgssenter for å sikre framtidig arealbruk for tenestetilbodet innan helse og omsorg.

Politisk behandling

• Eldrerådet og Rådet for menneske med nedsett funsksjonsevne skal gi sine uttaler i saka 10. februar
• Utvalet for helse og omsorg skal vedta si innstilling til formannskapet 11. februar 
• Formannskapet skal vedtak si innstilling til kommunestyret 12. februar.