Formannskapet på synfaring av utbygginga på Engebø.

Synfaring på Engebø Sunnfjord kommune

I går reiste formannskapet på synfaring til Nordic Mining si utbygging av Engebø. Der fekk vi ei god oppdatering på kor langt dei har kome i prosessen. Vi var oppe på Engebø-fjellet der geolog Steinar Kleppe forklarte om omfanget og kvaliteten på minerala dei skal utvinne. Kennet Nakken Angedal som leiar utbygginga og seinare drift av anlegget informerte om dei omsyna dei tar i høve miljøet, men også om nokre av dei utfordringane dei møter i prosjektet. Vi var også nede ved sjøen og fekk sjå kor langt dei har kome med å bygge administrasjonsbygg, vedlikehaldsbygg og bygg for sjølve produksjonen.

Besøk frå Polen

Delegasjonen frå Polen vinkar farvel Sunnfjord kommune

I førre Nytt frå kommunedirektøren skreiv eg om at vi fekk besøk frå Opoczno i Polen denne veka. Dei hadde eit hektisk program over dei få dagane dei var her. Takk til alle som bidrog til å gjere opphaldet deira givande. Her har nok varaordførar Anne Llilleaasen og Malin Solheim Moldestad, saman med Trond Ueland og Sunnfjord Utvikling gjort mykje for at det vart eit godt opplegg. Då den polske delegasjonen reiste på onsdag ettermiddag, var dei klare på at dei hadde hatt eit svært godt opphald hos oss.

Lindhagen – klar for innflytting i juni

Bustadprosjektet Lindhagen i Angedalsvegen har vore eit byggeprosjekt i nært samarbeid med Sunnfjord kommune. Kommunen eigde tomta, men la den ut for sal med vilkår om at kommunen skulle ha fortrinnsrett på å kjøpe to eller tre husvære og at vi skulle ha tildelingsrett på kven som skulle få kjøpe fem husvære til ein makspris på 2,1 mill. Bakgrunnen var at vi ville sikre at unge uføre med behov for å bu sentralt, skal få høve til å eige eigen bustad.

Synfaring Lindhagen Sunnfjord kommune

I tillegg stilte kommunen krav om at bustadprosjektet skulle ha gode fellesløysingar i bygget som kan kome alle bebuarane til gode. Lindhagen har derfor eit stort felles kjøkken/stove i 1. etasje, To gjesteleilegheiter som ein kan låne om ein skal ha besøk, stort rom som kan nyttast til trenings-/hobbyrom eller verkstad, og felles terrasse både i 1. etasje og på taket. I tillegg er det lagt til rette for møteplassar i alle etasjar. Saman med utval for helse og omsorg var vi på synfaring denne veka, og det har blitt eit verkeleg flott bygg. Dei som skal flytte inn her, er heldige! Det er stort aldersspenn på bebuarane alt frå 19 til 85 år!

Vi gratulerer Gravdalgruppa med eit flott bustadprosjekt og takkar for godt samarbeid! Vårt mål er at vi skal ha fleire slike samarbeidsprosjekt med private utbyggarar i åra framover!

Fullt hus og stormande jubel for Dans utan grenser si vårframsyning

Sist laurdag hadde danseprosjektet Dans uten grenser vårframsyning i Storsalen i Førdehuset. Dei 250 unge dansarane skapte ei forrykande forestilling med filmklassikarar som tema. Med flott koreografi, profesjonell lys og lyd, gode danseprestasjonar og ikkje minst herleg danseglede fekk publikum i to nær fullsette framsyningar ei nydeleg oppleving!

Dans Uten Grenser Førde held til på Løa ungdomsklubb, og tilbyr danseundervisning frå 1. klasse til og med 3.vidaregåande. Dans Uten Grenser er ein inkluderande organisasjon som er drifta av 14 ung- instruktørar i alderen 14 til 19 år. Målet er å gje barn og unge danseglede og meistringsevne. Elevane får vere med på ei framsyning i Førdehuset per semester, der elevar saman med instruktørane får vist fram kva dei har jobba med dette halvåret.

Vårframsyning dans uten grenser Sunnfjord kommune

Nytt pasientvarslingssystem på Førde og Sande omsorgssenter.

Førde og Sande omsorgssenter får nytt pasientvarslingsanlegg. Begge omsorgssentra har eldre sjukesignalanlegg med begrensa funksjonalitet og som vi ikkje kan vidareutvikle. Sunnfjord kommune har ein medviten strategi der vi vil gjere oss nytte av den moderne digitale teknologien. Moglegheitene er store når det gjeld bruk av ny teknologi til pasientvarsling/pasientomsorg.

Det nye systemet betyr vekk med tradisjonelle ringesnorer og panel/skjermar i gangane og på vaktrom. Erstatta av nye velferdsteknologiske trådlause løysingar og alarmsendarar, med varsling på mobiltelefon. Alle tilsette på vakt har mobiltelefon. Brukar/pasient er utstyr med «smykke» på arm eller rundt halsen og eit trykk gjev varsel om at ein treng hjelp, uansett kor dei er i bygget. Dei tilsette har også «smykke» som dei kan opne, låse opp dører med, utløyse naudalarm dersom det er naudsynt.

Gevinsten er stor både for brukaren og dei tilsette. Brukaren vil oppleve tryggleik og kvalitet på tenesta. Arbeidskvardagen for dei tilsett vil bli lettare fordi ein får alarmane der ein er (slepp å gå tilbake å sjå på panelet og sjå kven som ringer). Det vil også gje betre ressursutnytting. Det gjev også gevinst i utvida bruk av eksisterande bruk av EPJ (elektronisk pasientjournal). Pasientdata frå EPJ følgjer pasienten heile tida og vil alltid vere oppdatert med all relevant informasjon og loggføring. Plattforma vil også kunne inngå i ein einheitleg løysing for Sunnfjord kommune og samarbeid med Alarmesentralen og responssenteret i Florø. Kommune vil her få fordel av felles Mobil-App og administrasjonsgrensesnitt for heimeteneste og institusjon

Systemet har fleire moglegheiter:

•  rørslesensorar – fortel at pasient/brukar forlet seng, rom, avdeling eller ut av «huset».
•  sengematter – kan varsle epilepsianfall, fortel at også brukar går ut av   senga.
•  kameratilsyn
•  loggføring i EPJ
•  GPS alarmar, fortel kor pasient/brukar er.
•  dør- og vindaugealarm
•  varsling av brann, på mobiltelefon.
•  med meir

Nytt personvarslingssystem Sunnfjord kommune

Pasientvarslingssystemet på Førde omsorgssenter er komme plass og sett i drift. Alle tilsette og pasientar/brukarar har fått opplæring. Vi har allereie fått gode tilbakemelding frå nøgde brukarar av systemet.

På Sande omsorgssenter startar installasjonane no i juni og opplæring og oppstart av anlegget vil skje i starten på september 2023.

Med i planane er at omsorgssentra i Naustdal og på Skei skal få tilgang til same teknologien.

Testing av naudvarsel på mobil – følg med!

Onsdag 14. juni klokken 12 testar politiet Nødvarsel på mobil over heile landet. Samtidig testar Sivilforsvaret tyfonane/varslingsanlegga med signalet "Viktig melding – søk informasjon.Testen vert gjennomført for å gjere befolkninga kjent med systemet, og for å sjekke at det fungerer som det skal.

Naudvarselet skal nå ut til alle kompatible mobiltelefoner som er slått på, og som har dekning på 4G/5G. Telefonar som får testen, vil vibrere og spele av ein høg lyd i ca. 10 sekundar samtidig som det kjem opp ein tekst på norsk og engelsk foran på skjermen.

Testen vil overstyre lydlaus og andre innstillingar på telefonen. (For ikkje å få varselet, må telefonen skrus heilt av, eller settast i flymodus i god tid før og etter klokka 12.) Teksten i varselet omtaler at dette er ein test, og at du ikkje treng å gjere noko.

Syt for at telefonen din er oppdatert med nyaste programvare, elles kan det vere ei årsak til at du ikkje vil få varselet. Det er heller ikkje alle telefoner som kan ta imot naudvarselet. Du kan sjekke på nødvarsel.no om din telefon er kompatibel.

Informer gjerne også medlemmar i familien din som kanskje ikkje har fått med seg at det kjem ein test, og kvifor dette vert gjort. Tilbakemeldingar på testen kan registrerast på eige skjema på nødvarsel.no Her finn du og meir informasjon om testen. Eg oppfordrar alle til å ha mobilen på, slik at vi får testa beredskapen når det gjeld varsling.

Plan for helga?

Dersom du ikkje har bestemt deg for kva du skal bruke helga til, kan du kanskje få ein idé ved å sjå gjennom ulike kulturhendingar og anna som skal skje. Her kan du i alle fall sjå gjennom aktivitetskalenderen!

God helg til alle!

Terje Heggheim
Kommunedirektør