Takk til Teknisk drift!

Sunnfjord kommune

Førre helg vart ei våt helg med store nedbørsmengder. Kan hende du opplevde at det meste gjekk greit. Det gjorde det fordi kommunen hadde sine medarbeidarar på Teknisk drift ute både natt og dag. Det byrja med driftsforstyrringar på vassverket i Førde klokka 0400 natt til laurdag. Deretter gjekk det slag i slag til måndags morgon. Laurdagen fekk vi inn over 50 telefonar frå ulike delar av kommunen. Nokre vart det respondert på, andre vart vist til andre som kunne hjelpe.

Samla sett vart det meldt inn om hendingar både i Førde, Sande, Naustdal, Skei og Vassenden. Det handla sjølvsagt om tette bekkar, overflatevatn, tette slukar, tette overvasskummar og utfordringar med avlaupspumper.

Eg vil takke mannskapet på Teknisk drift for den jobben de gjorde heile førre helg. Innsatsen gjorde til at følgjene av dei store nedbørmengdene vart mindre enn kva dei kunne ha vorte. Slik gjer de Sunnfjord til ein tryggare kommune å bu i. Takk!

Kurs for pårørande til personar med demens

Demensteama i Sunnfjord kommune har i haust arrangert pårørandekurs for pårørande til personar med demens, i lag med Askvoll og Fjaler kommune. Totalt 32 pårørande deltok dei 4 kveldane på Førde omsorgssenter.

Målet var å gje ei innføring i kva demens er, og gje råd og rettleiing til pårørande så dei lettare kan takle omsorgsrolla. Det var også lagt opp til gruppesamtalar med pårørande.

Det var ulike tema desse kveldane. Camilla Savland, fastlege ved Naustdal legesenter, snakka om korleis dei ulike demenssjukdomane utartar seg og at miljøet rundt pasienten er avgjerande for at vedkomande skal fungere best mogleg. Toril Marie Terum, frå USHT, fortalde om ulike teknikkar som kan nyttast for å kommunisere og samhandle med personar med demens på ein god måte.

Demensteama er svært takksame for at andre pårørande stiller opp og delar erfaringar og utfordringar dei tidlegare har erfart som pårørande til personar med demenssjukdom. I år var vi så heldige at Rolf Thingvoll og Kristine Wallevik deltok med sine historier.

Advokat Jan Erik Mardal informerte om framtidsfullmakt og verjemål, noko som var svært nyttig, og deltakarane hadde mange spørsmål knytt til tema. Elles vart det informert om dei ulike tenestene kommunen har til denne brukargruppa, om hjelpemiddel og om ulike velferdsteknologiske løysingar som kan nyttast.

Pårørande gav svært gode tilbakemeldingar og dei fleste føler seg betre rusta til å stå i rolla som pårørande etter å ha delteke på kurset. Nokre har også etablert kontakt med andre pårørande etter desse kurskveldane.

Demensteama i Sunnfjord kommune arrangerer pårørandekurs kvart år og ynskjer endå fleire deltakarar velkomne neste år.

Jubilantar i 2023

Sunnfjord kommune

Tysdag 12. desember var det tid for å markere våre tilsette som har 25 års tenestetid i kommunen i 2023. Markeringa skjedde på Scandic Sunnfjord hotell, kor 23 av dei 28 jubilantane i år var til stades saman med sin einingsleiar og kommunalsjef. Ordføraren takka i sin tale dei tilsette for lang og tru teneste i sine tidlegare kommune og Sunnfjord kommune, noko som eg sjølvsagt sluttar meg til !

Kommunestyret vedtok budsjettet for 2024

Sist fredag vedtok kommunestyret budsjettet for neste år. Eg opplever at både administrasjonen og dei folkevalde ser likt og alvorleg på den økonomiske stoda i kommunen Utdrag av nokre kommentarar frå debatten:

• 2024 må bli det 2023 ikkje vart. Vi må få betre kontroll på drifta.
• Kommunedirektøren må sikre orden i eige hus. Vi forventar ikkje berre ein plan for omstilling men at kommunedirektøren gjennomfører.

Samtidig opplever vi ytterlegare auke i styringsrenta og dermed auka rentekostnad for kommunen. Vi merkar og på likviditetssituasjonen at økonomien er krevjande, då vi no i desse dagar må bruke kassakreditt for første gong i Sunnfjord kommune.

Leiargruppa har derfor stor merksemd om den økonomiske situasjonen. Vi planlegg fleire tiltak for å vere tett på den økonomiske omstillinga.Arbeidsgruppene skal levere sine delrapportar på tenesteanalyse 20. desember.

Desse skal danne grunnlag for ei samla tenesteanalyse med framskriving av konsekvensar av demografiske endringar. Deretter skal vi starte utgreiing av innsparingstiltak. Kvar kommunalsjef blir kalla inn til samtale med kommunedirektør og ass. Kommunedirektør for gjensidig oppdatering av status i sektorane og plan ved eventuelle avvik. Einingar som rapporterer vesentleg meirforbruk i 2024 vil måtte legge plan for å kome i balanse og ha møte med respektiv kommunalsjef månadleg. Vi vurderer og om enkelte einingar med større meirforbruk over tid skal få redusert fullmakt til økonomiske disposisjonar fram til meirforbruket er under kontroll.

Det er slitande for organisasjonen å vere i økonomisk ubalanse. Det er difor både nødvendig og motiverande å jobbe for å kome innanfor vedtekne budsjettrammer. Men det gjer ikkje seg sjølv, så vi må stå samla og hjelpe kvarandre for å nå dette felles målet.

Stang inn for tre søknader om midlar frå fylket

I Sunnfjord kommune er vi opptatt av å skape gode kvardagsliv, og da Vestland fylkeskommune lyste ut midlar til by – og tettstadsutvikling sendte vi inn tre søknadar som vi har fått tilsegn på. I utlysinga stod det: Tilskotsordninga skal bli brukt til by- og stadutvikling, sosial utjamning av helseskilnadar, og til å mobilisere til klimaomstilling og nullutslepp. Dette for å skape tilgjengelege, inkluderande og trygge stadar der folk trivast, kjenner tilhøyrsle og stimulerer til aktive liv.

Vi fekk til:

• Viksdalen nærmiljøråd og Vikja moglegheitsstudie: der nærmiljørådet skal utvikle ein planmetodikk for småsamfunn gjennom bruk av «plansmie». Målet er å få ferdig ein rapport med konkrete kortsiktige og langsiktige planar og tiltak for å utvikle Vikja sentrum og omkringliggjande område på Viksdalen til ein berekraftig, attraktiv og levande landsby.
• Sande skule er prosjektert til å bli bygd om og rehabilitert innan 2026. Uteområdet er kun tenkt tilpassa skulebruk, vi vil gjenbruke materialer frå skulen for å skape eit levande område kring skulen som kan brukast av alle etter skulens opningstider. Slik vil vi vere med å skape ein levande, attraktiv og universell utforma lågterskel møtestad.
• Grøderike Sunnfjord - Sunnfjord kommune ønsker å legge tilrette for auka trivsel og attraktivitet i ein fortetta Førde by. Vi har parkar og byrom som har potensiale til å få auka innhald og liv,. Dersom vi klarer å auke engasjement for å skape noko i fellesskap, vil prosjektet kunne bidra til eit meiningsfylt liv for fleire i samfunnet. Prosjektet skal skape attraktive hagerom for å dyrking, nettverksbygging, samskaping og matkultur. Tilbodet skal vere tilgjengeleg, ha universell utforming, vere inkluderande og nært

Til saman fekk vi over to millionar kroner til desse føremåla.

Tusen takk til Dans uten grenser Førde for ei flott framsyning!

Sunnfjord kommune

Gratulerer med nydeleg danseframsyning utført av 250 dansarar frå Dans uten grenser. Tema var "Jul med omtanke" ei hjartevarm oppleving som vil bli hugsa lenge.

Framsyninga er ofte høgdepunkta i semesteret, og mange har gleda seg stort til å stå på scena. Vi blir like imponert kvar gang over kva elevar og instruktørar, som til dagleg dansar på eit lite dansegolv på Løa, viser fram her på scena i Førdehuset.

Gjennom 24 luker med ord og uttrykk har Perspektiv med elevar gitt oss ein julekalender med omtanke. Og ei påminning om at ei god gjerning frå oss alle, kan gjere ein forskjell for korleis dei rundt oss opplever førjulstida og jula.

Ei ekstra takk til heile teamet og instruktørgruppa Perspektiv, som har miksa musikk og koreografert all dansen. På vegne av Sunnfjord kommune vil vi takke Mia, Ingeborg, Erle, Mathea, Åsfrid, Malin, Malene, Ronja, Sofie, Una, Inga , Henriette og Tiril.

Dans er ikkje berre rørsle, det er ein språklaus tale som kallar fram følelsar, skaper samhald og tryllar fram magi på scena. Det var inspirerande å sjå korleis ung til ung formidling saman med god krefter rundt teamet har klart å skape noko så vakkert og meiningsfullt. Stas var det for kommunalsjef kultur og idrett å få komme med velfortent ros og ei helsing frå kommunen.

God jul og godt nytt år!

Eg vil nytte høve til å takke alle tilsette og folkevalde for vel utført arbeid i året som snart vert avslutta. Takk til alle frivillige lag og organisasjonar for det flotte arbeidet de gjer til beste for innbyggarane i kommunen vår.

Eg ønskjer alle ei god jul og godt nytt år!

Plan for romjula?

Dersom du ikkje har bestemt deg for kva du skal bruke romjula til, kan du kanskje få ein idé ved å sjå gjennom ulike kulturhendingar og anna som skal skje. Her kan du i alle fall sjå gjennom aktivitetskalenderen!

Terje Heggheim 
Kommunedirektør