Sist veke stemte kommunestyret i Fjaler, Høyanger og Sunnfjord for eit vertskommunesamarbeid i NAV og i går gjorde Hyllestad det same. Ørjan Haram, kommunedirektør i Høyanger og leiar av styringsgruppa seier:
Det har vore ein lang prosess frå vi starta utgreiinga av eit mogleg vertskommunesamarbeid, og Askvoll har undervegs vedteke å ikkje bli med. Det er kjekt at det no er avgjort og ein kan starte arbeidet med organiseringa.
Terje Heggheim, kommunedirektør i Sunnfjord er godt nøgd med at alle dei fire kommunane sluttar seg til avtala. Vi er eit felles bu- og arbeidsområde, og har god tradisjon for å samarbeide på tvers, seier Heggheim. Innbyggarane flyttar seg mellom kommunane for jobb og skule, og eit interkommunalt samarbeid om NAV sine tenester vil gjere det lettare å yte gode tenester både til innbyggarar og til næringslivet når dei har behov for arbeidskraft.
Kommunedirektørane har i prosessen med å få til vertskommunesamarbeidet vore opptekne av ambisjonane om at samarbeidet skal syte føre likeverdige tenester av god kvalitet og eit stødig fagmiljø. I tillegg har dei vektlagt at det skal vere lokasjonar i alle kommunane, slik at dei som treng det, kan møte NAV i sitt nærmiljø.
Heggheim poengterer at det er gode grunnar til å sikre stabile tenester frå NAV framover, og nemner flyktningane som har behov for hjelp til å komme i arbeid og ungdom som fell utanfor skule og jobb. Dette er utfordringar vi deler på tvers av kommunane, seier Heggheim.
Fylkesdirektør i NAV Vestland, Bjarte Hysing-Olsen stiller seg bak Heggheim sine ord og legg til:
Mange bedrifter i Vestland slit i dag med å få tak i arbeidskraft. Dette vil bli ei endå større utfordring i åra som kjem, når vi blir færre personar i arbeidsfør alder. Eg er oppteken av eit godt samarbeid med næringslivet. NAV kan hjelpe bedriftene med arbeidskraft samstundes som dei kan gje personar som treng det ein sjanse i arbeidslivet.
Hysing-Olsen avrundar med at samarbeidet som no skal byggast opp mellom kommunane vil gje eit godt grunnlag for å støtte næringslivet i regionen.