Sjå årsbudsjett, økonomi og handlingsplan 2026–2029
Økonomisk innsparing og omstilling
Sunnfjord kommune er i ei økonomisk omstilling. Det er nødvendig å gjere innsparingar då driftsnivået i Sunnfjord kommune over tid har vore for høgt. Ambisjonsnivået på innsparingar er 121 mill. kroner frå 2025 og ut ny planperiode.
I tillegg er det nødvendig å gjere omstillingar då vi blir færre barn og unge og fleire eldre. Midlar må flyttast frå tenester med færre brukarar til tenester med fleire brukarar. Ambisjonsnivået på omstilling er 78 mill. kroner frå 2025 og ut planperioden. Omsorg, helse og sosial sitt behov for styrking grunna demografi endringa er på 88,0 mill. kroner.
Innsparings og omstillingsarbeid
Målet med det samla innsparings- og omstillingsarbeidet på totalt 199 mill. kroner i perioden 2025-2029 er å oppnå ein stabil og føreseieleg økonomi i kommunen. Dette er nødvendig for å skape større handlingsrom til å kunne prioritere blant gode formål, og for å gje best moglege tenester til innbyggarane. Årsbudsjett, økonomi- og handlingsplan for 2026-2029 er derfor eit steg for å oppnå denne målsettinga. Nivå på innsparing- og omstilling er i planen fordelt på dei ulike sektorane. Konkrete tiltak kjem i eigne dokument og orienteringar.
Saldering
I tillegg til innsparing og omstillingsarbeid er det budsjettert med ei saldering av budsjettet på 63,5 mill. kroner. For å balansere budsjettet er dette lagt som eit auka krav om innsparing i sektorane.
Investering
Sum prioriterte investeringar utgjer i 2026 160,4 mill. kroner. Desse er finansiert med:
- 24,3 mill. kroner i mva-kompensasjon
- 10 mill. kroner i tilskot frå andre
- 2,7 mill. kroner i sal av varige driftsmidlar
- 117,4 mill. kroner i låneopptak
- 6 mill. kroner frå ubunde investeringsfond
Det er ikkje funne handlingsrom i drifta til å overføre midlar får drift til investering i planperioden. Dei største løyvingane i investering er:
- rehabilitering av Sande skule med 154,1 mill. kroner
- midlar til ny sjukeheim i Førde med 268 mill. kroner
- Astruptunet-visningssenter 131,7 mill. kroner.
Det er i tillegg budsjettert med 50,0 mill. kroner til vidareutlån til finansiering av bustadkjøp for personar med langvarige utfordringar med å få lån til eigna bustad i vanleg bank, og 5,0 mill. kroner til førstegongskjøparar. Ordninga er finansiert med låneopptak i Husbanken.
Utvikling i befolkning
Korleis befolkninga er samansett påverkar kva tenester kommunen bør produsere meir eller mindre av. Utviklinga i befolkninga påverkar også inntektene vi får frå staten.
Hovudtrekk dei neste fire åra
- Fødde (0 år): Dei siste to åra har hatt ein høgare fødselsrate enn venta. Det gir ei svak, men positiv utvikling (+5) i framskrivinga.
- Barn (1-15 år): Nedgang i dei fleste aldersgrupper. Størst reduksjon i gruppa 13-15 år (-131, - 13 %). Signaliserer færre ungdommar og framtidig nedgang i elevtal i ungdomskule.
- Ungdom og vaksne (16-29 år): Stabilt totalt, men med variasjon. Kan påverke rekruttering til arbeidsmarknaden og høgare utdanning.
- Yrkesaktiv alder (30-66 år): Svak vekst (+32). Denne gruppa er relativt stabil, men ikkje nok til å kompensere for nedgang blant yngre.
- Eldre (67 og oppover): Størst vekst i 80 år og eldre (+255, + 25 %). Dette er den mest markante endringa og vil ha stor betyning for tenestetilbodet i kommunen. Signaliserer ei særleg styrking av omsorgssektoren.
Basert på folketalsframskrivingar frå SSB med middels nasjonal vekst
Årsbudsjett tidlegare år