Anita Höllige
Prosjektskildring for Ballettproduksjonen Nøtteknekkaren
Søkjar
Ballettproduksjonen Nøtteknekkaren er eit samarbeidsprosjekt mellom Danseverkstedet ved Jorunn Reina, koreograf Miriam Lund-Førde, Sunnfjord kulturskule, distriktsmusikarar frå Sunnfjord og Gloppen og Teater Vestland.
Kontaktperson for søknad: Jorunn Reina (mobil: 472 32 429 e-post: jorunn.reina@enivest.net)
Søkjer midlar til
Vi søkjer midlar til oppsetjing av den verdskjende balletten Nøtteknekkaren, med to offentlege framsyningar i Storsalen i Førdehuset den 29. og 30. november 2024. Balletten vil bli framført av born og unge frå Danseverkstedet og Sunnfjord kulturskule, samt profesjonelle og amatørmusikarar, koreografar, solistar, sceneteknikarar og frivillige.
Nøkkeltal
Budsjettet er på kr 370 000, og vi søkjer Sparebankstiftinga Vest om kr 80 000. Totalt er 120 born og unge involvert, i tillegg til 20 profesjonelle og cirka 20 frivillige som arbeider over tre dagar i Førdehuset. Vi forventar å selje 800 billettar til dei to framsyningane til ein verdi av kr 200 000,-. Eigeninnsatsen utgjer ein verdi på kr 70 000.
Skildring
Nøtteknekkaren vert i år sett opp for sjuande gong sidan 2011, og er ein av dei største lokale produksjonane i Førdehuset. Produksjonen er heileleks lokal, med musikk av Tsjaikovskij til arrangement og koreografi av profesjonelle lokale musikarar og pedagogar frå Sunnfjord og Gloppen. Alle dei 120 deltakarane er til dagleg elevar ved Danseverkstedet og/eller Sunnfjord kulturskule. Nøtteknekkaren er eit frivillig og ope tilbod til motiverte elevar, med øvingar gjennom heile hausten, inkludert fleire øvingshelgar og ei veke med sceneprøvar og framsyningar i Førdehuset. Deltakinga er kostnadsfri for alle elevane, og eit eventuelt overskot vil bli brukt til framtidige oppsetjingar og samproduksjonar.
Prosjektet er eit 0-kroner prosjekt, der verken Danseverkstedet eller Sunnfjord Kulturskule tener pengar på produksjonen. Dei frivillige spelar ei avgjerande rolle, både bak scena og i arbeidet med å sy kostymer. Denne produksjonen er viktig for å styrkje lokal identitet og engasjerer eit breitt spekter av lokale deltakarar og ressursar.
Bakgrunnen for denne produksjonen er eit langvarig samarbeid mellom Danseverkstedet og kulturskulen, der lokal skaparkraft og ressursar har vore drivkraften. Frå 2017 har Teater Vestland (tidlegare Sogn og Fjordane teater) også vore med på laget. Med Nøtteknekkaren har vi eit høgt ambisjonsnivå og ønskjer å gi dei unge dansarane, songarane og musikarane ei profesjonell oppleving som dei elles berre kan sjå frå utsida, enten som tv-sjåarar eller som publikum på større scener. Samanlikna med Danseverkstedet og kulturskulen sine årlege framsyningar og elevkonsertar, der mindre grupper framfører enkeltståande nummer, er Nøtteknekkaren ei reindyrka klassisk heilaftens danseframsyning med levande musikk. Her får kvar deltakar ei viktig rolle i å formidle det magiske juleeventyret til eit stort publikum.
Det er sjeldan at amatørar og profesjonelle samarbeider så tett og står side om side på scena. Å vere ein del av ein produksjon av dette omfanget gir sterk motivasjon for det daglege arbeidet i danseklassar og øvingstimar. Erfaring frå tidlegare oppsetjingar viser at dette er ei oppleving som barna ikkje gløymer, og som gir dei ei kjensle av skaparkraft og kunstutøving på nivå med profesjonelle scener. Den gir også betydningsfulle fellesopplevingar som ein tek med seg tilbake til ordinær undervisning. Heile prosjektet er ein viktig danningsarena for barna.
Med vår lange erfaring med oppsetjingar av Nøtteknekkaren, kan vi med tryggheit seie at prosjektet har bevist sin verdi og kvalitet, og at det gir ei uvurderleg erfaring og utvikling for barna. For å oppretthalde og vidareutvikle dette viktige kulturelle tilbodet, er vi avhengige av økonomisk støtte, og vi håpar på positiv respons for å realisere denne fantastiske produksjonen.
Bildeserie Nøtteknekkaren 2013 - Firda
Artikkel om Nøtteknekkaren 2017 - Firda
Artikkel om Nøtteknekkaren 2019 - Firda