Det er svært individuelt korleis barn tilpassar seg den nye kvardagen, men det er uansett lurt å sette av minimum tre dagar til tilvenninga. Dersom de har betre tid, er dette berre positivt. 

Nei, for at barna skal få ein roleg og trygg start, vil dei byrje til ulike tider. I god tid før oppstart vil vi avtale tid  for når oppstarten skal skje for ditt barn. De vil få oppgitt dag og tidspunkt og so er vi sjølvsagt open for dialog om dette tidspunktet ikkje skulle passe. 

Ja, det vil vere ein "primærkontakt" som skal ha eit spesielt ansvar for ditt barn og sikre at det blir sett og tatt i vare på best mogleg måte. I tilvenningsperioden blir primærkontakten spesielt viktig fordi ho/han har ansvar for å etablere tryggheit og nærheit til barnet, og hjelpe det med å finne seg til rette i barnehagen. I tillegg skal primærkontakten sørge for god kontakt og kommunikasjon med dykk for foreldre. 

Første dag

Denne første dagen kjem de til avtalt tid. Den skal være kort og du er der i lag med barnet heile tida. Det er viktig at de som foreldre er aktivt med og hjelper barnet til å bli kjent i miljøet i barnehagen. Primærkontakt vil søke kontakt med barnet med mål om å skape tillit mellom seg og barnet. 

Andre dag

Den andre dagen startar etter avtale med personalet og vil vare noko lengre enn første dag. Målet er at personalet skal da ta meir ansvar for barnet. Denne dagen kan de etter avtale med personalet forlate barnet/rommet ei lita stund. 

Tredje dag

Utgangspunktet for denne dagen vil vere korleis det har gått med barnet dei to første dagane. Viktig at det er avtalt tidspunkt for oppmøte mellom foreldre og barnehage. Dette for å sikre at kontaktperson er kome på jobb når barnet kjem. Målet er at barnet denne dagen er meste parten av tida der utan foreldre. Dette avtales sjølvsagt individuelt med kvar enkelt familie. Det er anbefalt at denne dagen ikkje er alt for lang, 4-5 timar. 

Dagane vidare framover

Overgangen til barnehagelivet, er ein lausrivingsprosess for både barn og foreldre. Dei fleste barn blir slitne av å begynne i barnehage. God tid om morgonen og rolege ettermiddagar, der barnet får vere i lag med de som foreldre, kan være ei god investering. Vi anbefaler også, der de har moglegheit til det, å starte med kortare dagar for så gradevis å auke opp til det som vil bli den normale oppholdstida for barnet. 

Det viktigste er at de aldri går i frå barnet utan å seie klart i frå. Fortel barnet at no må mamma/pappa gå og sei "hade".  Gje barnet ”ha det kos” og klare signal på at du kjem tilbake for å hente det. Det å skulle forlate barnet sitt i barnehagen kan være vanskeleg og sårt for deg som forelder. Mange foreldre opplever at barnet gret ved avskjed om morgonen. Vår erfaring er at gråten er naturleg og i dei fleste tilfeller stilnar den like etter at foreldra er gått.  Din måte å handle på i avskjeden er med på å trygge barnet på at dette går bra. Utsetting, stadige forhandlingar og usikkerheit frå foreldra si side vil lett smitte over på barnet og gjere avskjeden vanskelegare for barnet. Er du trygg på avskjeden, blir også barnet meir trygg i situasjonen og tilvenningsprosessen kan kjennest lettere for alle parter.