Ny samansetting av ungdomsrådet

I møte 25. september valde kommunestyret nye medlemmer og varamedlemmer for perioden frå oktober 2025 til september 2026. Det er kjekt at fleire av medlemmene og varamedlemmene som var med i førre valperiode ville halde fram arbeidet i ungdomsrådet. Det er òg kjekt at det har kome inn fleire nye medlemmer og varamedlemmer. 

Oversikt over medlemmer og varamedlemmer (PDF, 204 kB)

Det “nye” ungdomsrådet hadde sitt første møte 13. oktober. Både medlemmene og varamedlemmene vart kalla inn til dette møtet for opplæring om rolla som medlem i ungdomsrådet. Dei fekk òg møte ordføraren som ønskte dei velkommen. Det var ein engasjert gjeng, og god stemning i pausen med bli-kjent-bingo. 

Sunnfjord kommune

Val av leiar og nestleiar

I neste møte 20. oktober valde ungdomsrådet Helene Andrea Haukereid som leiar og Birk Sørebø Hauger som nestleiar i denne valperioden. 

Helene er frå Høyanger kommune og går andre året på studiespesialisering ved Førde vgs.  Ho er ny i ungdomsrådet, men har erfaring som leiar i elevrådstyret ved Førde vgs.  

Birk går i 10. klasse ved Vassenden skule. Han var medlem i ungdomsrådet i førre valperiode.  

På bildet til venstre sit Helene og Birk i midten på fremste trappetrinn. 

Val av satsingsområde 

Våren 2024 vedtok ungdomsrådet sin handlingsplan 2024–2027. Handlingsplanen har 5 satsingsområde, og i førre valperiode vart transporttilbod og møteplassar for ungdom prioritert. 

I møtet 20. oktober hadde det nye ungdomsrådet gruppearbeid og valde satsingsområda dei vil prioritere det komande året. Satsingsområdet som fekk flest stemmer var Ein god skulekvardag. Det vart lagt vekt på at kommunen skal gjennom fleire planar og prosessar knytt til skulestruktur som ungdomsrådet vil vere tett på.  Skulehelsetilbod og skulemiljø var òg tema som vart trekt fram. 

Satsingsområdet Eit godt transporttilbod fekk nest flest stemmer. Det vart vist til at ungdomsrådet i førre periode gjorde mange bra tiltak, men det er nokre punkt som treng vidare oppfølging. Blant anna å sende ein uttale til Skyss og fylkeskommunen om lågare aldersgrense på ungdomsbilletten. 

Satsingsområdet Styrke ungdomsmedverknad kom på ein knepen tredjeplass, så ungdomsrådet vil òg arbeide med nokre tiltak her. Det vart trekt fram korleis arbeidet i ungdomsrådet kan bli meir synleg for ungdoms i innbyggarappen, og å opprette ei digital postkasse der ungdommar i kommunen kan melde inn saker til open post i ungdomsrådet.   

Følg med i innbyggarappen!

Du kan følge ungdomsrådet som aktør i Lokalt i innbyggarappen. Du kan òg følge med på nettsida Ungdomsrådet i Lokalt. Vi har eit mål om at nestleiaren skal publisere korte referat frå kvart møte slik at ungdommar kan sjå kva saker som er relevante for dei i kommunen. 

Last ned appen

1. Søk opp Innbyggerappen i App-store og GooglePlay og last ned (på telefonen eller nettbrett, ikkje pc)
2. Vel Sunnfjord kommune
3. Følg ungdomsrådet i Lokalt og godta pushvarsel for å få varsel om nye innlegg frå ungdomsrådet.