Sunnfjord kommune er blant dei største landbrukskommunane i landet og det er rekordstor investeringsvilje mellom sunnfjordjordsbøndene for tida. Korleis legg vi til rette for å ta vare på dette og å utvikle det vidare? Kva tema er viktig å adressere? Kva strategiar skal vi jobbe etter i Sunnfjord? Dette handlar Temaplan landbruk om. På høyringsmøtet vil dei viktigaste regionale «landbruksaktørane» vere med på panelsamtaler og gje sine innspel til høyringsutkastet. I tillegg vert stortingsrepresentant Nils T. Bjørke (SP) med på møtet og han vil bidra med eit «utanfrå-blikk» på planen og sunnfjordlandbruket. 

Til slutt ei statusmelding som kan kaste lys over Sunnfjordlandbruket sin posisjon

• Sunnfjord kommune er på topp ti lista over mjølkeproduksjon i Noreg.
• Sunnfjord er desidert størst på tal jordbruksføretak (500) og mjølk- og kjøtproduksjon i Vestland.
• Avverking av skog i Sunnfjord er på historisk rekordnivå og det er gode tømmerprisar.
• 243 millionar kroner i produksjons- og avløysartilskot gjekk ut til bøndene i Sunnfjord i 2024, via kommunens søknadshandsaming.
• Investeringsviljen har ikkje vore så stor som no sidan 1970/80-talet. I Sunnfjord er det under bygging/løyvd investeringstilskot i 2024/2025 til :
  • Mjølk lausdrift: 11 fjøs
  • Mjølk robot/velferd: 2 stk
  • Sau: 5 fjøs
  • Okse: 1 fjøs
  • Geit: 1 fjøs (generasjonsskifte)
  • Gjødsellager: 3 prosjekt

 I tillegg vart 3 kyrafjøs og eitt sauefjøs ferdiggodkjende i 2024. 

Plan for helga?

Dersom du ikkje har bestemt deg for kva du skal bruke helga til, kan du kanskje få ein idé ved å sjå gjennom ulike kulturhendingar og anna som skal skje. Her kan du i alle fall sjå gjennom aktivitetskalenderen!

God helg til alle!

Terje Heggheim
Kommunedirektør