Då nærmar juledagane seg og med det også overgangen til eit nytt år. 2024 har vore eit krevjande år for Sunnfjord kommune, men også eit godt år. Krevjande fordi vi slit med økonomiske utfordringar som gjer til at vi både må gjennomføre omstilling, innsparing og sjå på organiseringa av kommunen.
Det har vore eit godt år på fleire måtar. Sunnfjordskulen blir rangert blant dei beste i landet. Det er rett og slett oppløftande og blir sjølvsagt lagt merke til av andre som vil sjå på oss og lære. For nokre få dagar sidan vart vinnaren av arkitektkonkurransen for nytt visningssenter i Astruptunet kåra. Ei flott markering som set Sunnfjord på kartet, og som vil halde fram med det når vi arbeidar vidare med å realisere senteret.
For nokre veker sidan opna vi Frisksenteret i Naustdal. To flotte bygg som skal huse kommunale velferdstenester i den delen av kommunen. Tidlegare i haust markerte vi landslova med tre programfylte dagar på Ålhus og Vassenden. I ettertid fekk vi melding frå fylkesordførar Jon Askeland som roste arrangementet.
Eg kunne ha nemnd så mykje meir av det positive som skjer i kommunen, men eg bruker desse fire hendingane i 2024 for å peike på at trass i krevjande økonomiske tider, skal vi halde fram med å utvikle kommunen. Det skal vi gjere i alle åra som kjem. Vi skal på ingen måte lukke døra eller stenge kommunen, vi skal framleis ha fokus på å utvikle den til det beste for innbyggarane.
Eg vil takke tilsette og folkevalde for eit godt samarbeid i året som snart ebbar ut. Eg vil takke alle innbyggarane for gode og konstruktive innspel i ulike prosessar, som til dømes i arbeidet med kommuneplanen sin arealdel, og dei som vi mottek i desse dagar i høve barnehage og skule. Slik bidreg vi alle til Sunnfjord kommune sitt beste.
God vakt, seier eg til alle dei som skal arbeide i jul- og nyårshelga. Takk for at nettopp du er med å sikre velferdstenestene eller syter for at vi har ein operativ infrastruktur i høgtida også.
Nyt dei ekstra fridagane og lad opp batteria. 2025 vil krevje oss.
Eg ønskjer alle ei god jul og eit godt nytt år!
Opningstider jul- og nyårshelga
Vi har no publisert ein artikkel om opningstider på tenestetorga og sentralbord i jula 2024 på nettsida.
Plan for jul og nyårshelga?
Dersom du ikkje har bestemt deg for kva du skal bruke helgedagane til, kan du kanskje få ein idé ved å sjå gjennom ulike kulturhendingar og anna som skal skje.
God jul til alle!
Terje Heggheim
Kommunedirektør