Varlid er tilsett i Statens vegvesen og har vore prosjektleiar i bypakken sidan 2017. Han har styrt sekretariatsfunksjonen i bypakken og leia bygginga av tiltaka som no står fullførte i Førde.

Riks- og europavegprosjekta i pakken er ferdig bygde, og på bakgrunn av det, blir sekretariatsfunksjonen for bypakken flytta frå Statens vegvesen til Vestland fylkeskommune. Vegvesenet sitt ansvar vil vere avgrensa til bygginga av tiltaka i Angedalsvegen, Kyrkjevegen og bru Naustøyna-Storehagen (tiltak 8, 15, 18 og 19).

Nye prosjektleiarar

Marius Slinde tek over etter Varlid som Vegvesenet sin prosjektleiar i bypakken, når Varlid har sin siste arbeidsdag ved månadsskiftet februar/mars. Slinde har sin kontorstad på vegkontoret i Leikanger, men vil ha kontordagar i Førde for å følgje opp bypakken.

Malen Røysum er prosjektleiar i Vestland fylkeskommune, og skal leie arbeidet med tiltak 1 – ny bru og nytt vegsamband mellom Førdehuset og Hafstad.

- Vi er no i gang med å sette oss inn i planane, og førebur oss til grunnervervsprosessen. Målet er å kunne lyse ut dette prosjektet i slutten av 2026, med oppstart i 2027. Vi gler oss til å realisere eit viktig prosjekt, og ser fram til eit godt samarbeid med Vegvesenet, kommunen og andre partar, seier Røysum.

Den nye prosjektleiaren har kontorstad på Leikanger, men vil ha kontordagar i Førde, og har med seg ressursar frå fylkeskommunen sitt byggherremiljø i Førde inn i prosjektet.

Styringsgruppa held fram

Styringsgruppa vil som tidlegare bestå av representantar frå dei tre eigarane i Førdepakken; Statens vegvesen, Sunnfjord kommune og Vestland fylkeskommune.

- Endringane i prosjektleiinga vil i praksis ha lite å seie for korleis gjennomføring og styring av dei resterande prosjekta i Førdepakken skjer. Me kan også legge til at samansetninga i styringsgruppa held fram som før, seier Kjartan Hove, som representerer Vegvesenet og er leiar av styringsgruppa.

Les meir om Førdepakken

Foto: Statens vegvesen og Vestland fylkeskommune