Sunnfjord kommune markerte Frigjeringsjubileet med fleire arrangement denne veka
Vi har hatt arrangement i Naustdal, der forfattar Kjell Ove Noreide formidla historia om «Den svarte fredagen» – dei største flykampane over norsk jord under heile 2. verdskrigen. Meir om den svarte fredagen i Sunnfjord:
På frigjeringsdagen 8. mai la ordførar Jenny Følling ned krans på minnesteinen på Bringeland, til minne om dei falne. Vi var samla på Festplassen for å feire fridomen og veteranane våre sin innsats under krigen og seinare i internasjonale operasjonar, og gjekk i tog med flaggborg til stemningsfull fredskonsert i Førde kyrkje.
Under veteransamlinga i Førdehuset delte veteranane som var der sine historier. Blant dei Egil Hjelmeland som delte si historie frå då han som seksåring såg fleire av flya styrta under «den svarte fredagen». Slike personlege historier gir oss innsikt og perspektiv – og minner oss om at historia ikkje er fjern, men noko som har forma både lokalsamfunnet vårt og nasjonen vår.
«Også vi, når det blir krevet» står det i nasjonalsongen, då stiller vi opp. Vi utgjer ein forskjell – saman. For vi er ingenting utan dei vi har rundt oss. Samhald og vilje til å stille opp når det trengst, er vår styrke.
Sidan Noreg igjen vart eit fritt land 8. mai 1945, har over 100 000 norske kvinner og menn deltatt i meir enn 100 internasjonale operasjonar i kampen for demokrati og menneskeverd.
Tusen takk til alle samarbeidspartnarane våre som har bidrege til dei ulike arrangementa denne veka:
Norges Veteranforbund for Internasjonale operasjonar, Heimevernet, Norges Reservistforbund, Luftkampmuseet, Førde hagelag, Førde kyrkje, Førde Musikklag og frivillige.