Eit samfunnsnyttig prosjekt

Prosjektet tek sikte på å gi nye moglegheiter for menneske med redusert arbeidsevne eller behov for tilrettelagde arbeidsordningar. Målet er å skape meiningsfulle arbeidsplassar, styrke bylivet i Førde og utvikle eit inkluderande fellesskap med aktivitetar som engasjerer lokalsamfunnet. Tiltaket er ikkje-kommersielt og har eit tydeleg samfunnsnyttig formål.

Intensjonsavtalen

Avtalen gir Sparebankstiftinga rett til å gjennomføre eit forprosjekt og nødvendige tekniske, miljømessige og juridiske undersøkingar av Gamlebanken. Intensjonsperioden er eitt år, med mogleg forlenging. Kommunen stiller bygget til disposisjon for undersøkingar og gir stiftinga eksklusivitet i perioden.

Kommunen sitt bidrag

Dersom forprosjektet viser at tiltaket kan realiserast, er ein føresetnad at Sunnfjord kommune kan overføre eigedomen vederlagsfritt til stiftinga. Dette blir sett på som kommunen sitt bidrag til eit viktig tiltak innan inkludering, sosial berekraft og sentrumsutvikling. Eventuelle investeringar for oppgradering av bygget vil vere stiftinga sitt ansvar.

Positiv vurdering

Sunnfjord kommune vurderer at prosjektet støttar opp om kommunen sine mål for inkludering og utvikling av Førde sentrum som ein attraktiv og levande by. Intensjonsavtalen forpliktar ikkje kommunen til overdraging dersom prosjektet ikkje blir realisert, men gir stiftinga nødvendig tryggleik for å arbeide vidare med planane.