Sunnfjord kommune har starta arbeidet med kartlegging av strandsona. Dette skal gi betre kunnskap om naturmangfaldet og kva vi faktisk har igjen av natur langs fjordane og hovudvassdraga våre.

Prosjektet skal gi kommunen eit betre grunnlag for konsekvensutgreiing, fastsetting av byggegrenser og omsynssoner, og avgrensing av arealføremål i planarbeid.

Kommunen har fått skjønnsmidlar frå Statsforvaltaren til eit første steg i prosjektet. I 2025 vil vi kartlegge strandsona langs hovudløpet til Jølstra, frå og med Kjøsnesfjorden til utløpet i Førdefjorden. Dette skal gi verdifull erfaring til dei neste stega.