Fokus 2025: Samanhengen mellom klimaendringar og folkehelse.
Folkehelseprofil gjev ein oversikt over helsetilstanden i befolkninga og kva som påverkar denne.
Folkehelseprofilen 2025 har eit særleg fokus på korleis klimaendringar påverkar helsa vår. Verdas helseorganisasjon (WHO) meiner at klimaendringane er den største helsetrusselen globalt i dette hundreåret.
- Klimaendringar kan føre til auke i luftvegsplager, allergiar, hjarte-kar-sjukdommar og lungesjukdommar for nokre grupper. Spesielt barn, eldre, sjuke og dei med dårleg økonomi er ofte meir sårbare.
- Høgare temperaturar og meir nedbør kan gjere at sjukdommar som blir overførte via mygg og flått kan bli vanlegare i nye område. Fuktigare klima kan også gje betre forhold for virus, bakteriar og sopp.
- Ekstremvêr som flaum og tørke kan forureine drikkevatnet og truge matproduksjonen. Dette kan føre til mage-tarminfeksjonar.
- Klimaendringar kan skape uro og uvisse, og etter ekstremvêr kan fleire oppleve angst, depresjon og posttraumatisk stress.
Kommunen har ei viktig rolle i klimaarbeidet, både for å redusere utslepp og for å tilpasse seg eit klima i endring. Dette arbeidet må også ta omsyn til folkehelsa og sørge for at det ikkje aukar dei sosiale skilnadane. Kommunen har til dømes lagt til rette for gang- og sykkelvegar som er bra for både klimaet og folkehelsa.
Samla sett viser folkehelseprofilen at Sunnfjord har fleire positive trekk når det gjeld folkehelse, men det er også område som krev merksemd som dei potensielle helsekonsekvensane av klimaendringane. Kommunen har eit viktig ansvar for å jobbe med desse utfordringane for å sikre god helse for alle som bur her.
Litt om folkehelsa i Sunnfjord:
- I Sunnfjord er det ein lågare andel personar over 80 år samanlikna med heile landet.
- Det er gledeleg at færre i Sunnfjord bur i hushald med vedvarande låg inntekt enn det som er vanleg i Noreg. Dette betyr at fleire har ein tryggare økonomisk situasjon.
- Det ser ut til at mindre av befolkninga i Sunnfjord er utsett for fint svevestøv over grenseverdiane samanlikna med resten av landet. Dette er positivt for helsa vår.
- Færre 17-åringar i Sunnfjord trenar sjeldnare enn éin gong i veka samanlikna med landsnivået. Dette tyder på at ungdom i kommunen er relativt aktive.
- Skilnaden i forventa levealder mellom dei med berre grunnskule og dei med høgare utdanning er omtrent som i resten av landet. Dette er ein viktig indikator på sosiale forskjellar i helse.