Barn, unge og familiestøtte (BUFA)

Sunnfjord kommune styrkar arbeidet rundt barn og unge. Vi har nyleg etablert eit psykisk helseteam for barn, unge og deira familiar, og tenesta er under utvikling.

Kva er barn, unge og familiestøtte?

Barn, unge og familiestøtte er eit lågterskeltilbod for barn, unge og deira familiar, og er både eit førebyggande og behandlande psykisk helsetilbod.

Vi er tverrfagleg samansatt, har teieplikt og du treng ikkje tilvising for å kome i kontakt med oss. Tilbodet er gratis.

Om Barn, unge og familiestøtte

Teamet skal gjennom rettleiing, støtte og nærvær bidra til at fleire barn og unge får ein meiningsfull kvardag og eit godt koordinert tenestetilbod.

Vi ønsker å bidra til at barn, ungdom og foreldre skal få støtte og hjelp til å meistre eigne liv på måtar som er utviklingsstøttande og som fremmar god psykisk helse.

Vi er her for:

barn og unge frå 0 år ut vidaregåande opplæring og deira foreldre.
gravide
samarbeidspartnarar

Du kan kontakte oss

ved behov for hjelp og oppfølging til barn og unge som opplever ha det vanskeleg
dersom du som forelder er uroa for eit barn eller ungdom si utvikling, trivsel og åtferd
ved utfordringar i familie eller foreldrerolla

Korleis får du kontakt med oss?

Vi er organisert som ei avdeling under helsestasjonen, og samarbeider tett med helsesjukepleiarar.

Dersom du som forelder er uroa for ditt barn anbefaler vi at du tek kontakt med helsesjukepleiar på helsestasjon, eller på din skule. Dei har tett dialog med oss, og kan kople oss på ved behov. Helsesjukepleiarane har god kompetanse på psykisk helse, og veit kva som kan vere lurt å gjere dersom noko er vanskeleg.

Barn og unge kan sjølv ta direkte kontakt med helsesjukepleiar på sin skule.

Besøk oss på Prestebøen 8, andre etasje.

Ved akutte behov, kontakt legevakt, Barnevernvakt eller Alarmtelefon for barn og unge. Vi har ikkje ein akuttfunksjon.

Kontakttelefon

Ekspedisjon helsestasjon

Assisterande einingsleiar

Ungdomskontakt

Utekontakt

Kontaktskjema for psykisk helse barn og unge

Våre tilbod

Individuelle samtalar og familiesamtalar med fokus på endring

Kortvarig behandling av milde til moderate psykiske helseplager

Oppfølging / behandling av utfordringar knytt til rusbruk

Oppfølging av barn og unge med samansette behov

Ulike foreldrestøtte- og foreldrerettleingsprogram

Home-Start Sunnfjord

Kurs- og gruppetilbod til barn, unge og føresette

Kurs og gruppetilbod

Cool Kids – angstmestringskurs 7–12 år

«Cool Kids» er eit tilbod for barn i alderen 7-12 år. Det kan gjennomførast individuelt eller i grupper.
Det er vanlig å vere redd eller engsteleg av og til, men for nokre barn vert dette så vanskeleg at dei ikkje får til eller torer det dei eigentleg har lyst til å gjere.
Strevar du med uro, kan det ofte opplevast som at du er heilt ålene om å ha det sånn. I Cool Kids-gruppene får du treffe andre som har det på same måte, og de kan hjelpe og støtte kvarandre.

Gruppesamlingar

Alle barn som deltek på gruppesamling, har med seg foreldra eller ein annan vaksen dei stoler på. I gruppa er det mellom tre til fem familiar som deltek. Behandlinga består av ti gruppesamlingar på 90 til 120 min inkludert ein god pause.
Det viktigaste i Cool Kids er å hjelpe barnet til å møte det han eller ho er redd for litt etter litt. I gruppa får barnet lære korleis uro kan vokse og påverke kvardagen, og kvifor uroa ikkje forsvinn av seg sjølv. Barnet vil og lære å handtere uroa betre og ikkje la den ta over.

Hjelpsame tankar

Barna trener på å oppdage urolege kjensler og å finne andre og meir hjelpsame tankar, slik at dei fortsatt kan gjere det som er bra for seg.
Foreldra må vere forberedt på å vere aktive i behandlinga, og å trene på øvingar heime saman med barnet mellom gruppetreffa. Det er viktig at ein er med på kvart treff.
Dei fleste barn med uro og angst har fått det betre etter Cool Kids-kurs. Det er viktig at barn og foreldre held fram å bruke kunnskapen og etter at kurset er ferdig.

Chilled – angstmeistringskurs for ungdom 13 – 18 år

«Chilled» er kurset for deg mellom 13 og 18 som mellom anna gruer deg for å vere i store folkemengder, snakke høgt i klassen eller ta ordet i vennegjengen. Det kan gjennomførast individuelt eller i grupper.
Er du engsteleg for å ta bussen eller vere heime åleine? Har du plagsame tankar om kva andre tenker om deg?
For mange ungdommar vert tankar og kjensler så vanskelege at det går ut over deira livsglede. I verste fall hindra det deg i å drive med det du eigentleg har lyst til.

Møt det du er redd for

«Chilled» er eit kurs for deg som ynskjer å endre på dette, ved å lære deg gode strategiar saman med andre som opplev det same. Den viktigaste strategien du får lære på kurset, er å møte det som du er redd for litt og litt - med hjelp frå vaksne du kan stole på - slik at det ikkje vert for mykje på ein gang.
I gruppa får du lære korleis uro fungerer og kvifor uroa ikkje forsvinn av seg sjølv. Du vil også lære å handtere uroa betre og ikkje la den ta over.

Informasjon om kurset

Kurset går over ti møte. Det vil vere maks 5 deltakarar og to gruppeleiarar. Gruppeleiarane er vaksne personar med lang erfaring i å snakke med ungdom.
Foreldre har eigne møte med kurshaldarane der dei lærer korleis støtte ungdommen sin gjennom kurset og etterpå.

Vi har teieplikt

Alle tilsette i BUFA har teieplikt.

Tilsette ved avdelinga Barn, unge og familiestøtte (BUFA) må følgje reglar som gjeld for helse- og omsorgstenester, mellom anna i helse- og omsorgstjenesteloven og helsepersonelloven. Både barn og foreldre har rettigheter etter pasient- og brukerrettighetsloven.
Barn og ungdom har rett til mellom anna å bli høyrde, få informasjon og ha medverknad i eiga sak.

Foreldra sin rett til informasjon

Foreldre har rett til informasjon om barnet, men det er nokre unntak. Etter at barnet er fylt 12 år, skal foreldre ikkje få informasjon dersom barnet ikkje ynskjer dette, av grunnar som bør respekterast.

Foreldre skal heller ikkje få informasjon dersom situasjonen er alvorleg og helsepersonell vurderer det som barnets beste at foreldre ikkje får informasjon.

Er barnet over 16 år, har helsepersonell teieplikt overfor foreldre. Teieplikta overfor foreldra gjeld likevel ikkje opplysningar om svært alvorlege problem som ein ungdom mellom 16 og 18 år treng at foreldra grip inn i og hjelper dei med. Juridisk vert det kalla «opplysningar som er nødvendig for å ivareta foreldreansvaret».

For alle som jobbar i BUFA gjeld forvaltningslova, som alle som jobbar i stat og kommune må følgje. Dei skal mellom anna ikkje forskjellsbehandle utan lovleg grunn og elles oppføre seg rettferdig.

Samarbeider om å hjelpe deg

Nokre gonger er det fleire einingar inne som hjelper eit barn og foreldre samtidig. Vår erfaring er at det er nyttig for oss og bra for barn og foreldre at dei ulike einingane samarbeider ( det kan vere PPT, skule, helsesjukepleiar eller andre) . Vi snakkar ikkje med andre utan at dette er avtalt med dykk. Det vert kalla å be om «samtykke». I nokre tilfeller har vi meldeplikt. Det betyr at om barnet fortel noko som kan vere til skade for seg sjølv eller mennesker rundt seg, så må vi gå videre med dette til barnevern eller politi. Dette skjer ikkje utan at vi informerer barnet om dette.

Lover

Oppsøkande arbeid / Utekontakt / Ungdomskontakt

Ungdomskontakt er eit frivillig lågterskel tilbod for ungdom og ut vidaregåande opplæring, med fokus på førebyggande psykososialt arbeid.

Tilbodet består av individuell oppfølging, familiestøtte, felles aktivitetar (t.d. Grill`n`chill) tillegg til å koordinere og være ein samarbeidspart.

Både ungdom sjølv, deira vener, foreldre og våre samarbeidspartar kan ta kontakt direkte. Vi samarbeider med andre tenester ved behov, og etter avtale med ungdom og foreldre. Samarbeid med foreldre er vesentleg i vårt arbeid med ungdom.

Har ungdomskontakten teieplikt?

Ja! Du kan stole på ungdomskontaktane, og vi jobbar for deg og at du skal ha det best mogleg. Det betyr at det du som ungdom velger å fortelle, kan ikkje ungdomskontakten fortelje vidare utan at det er greit for deg.

Men! Ungdomskontakten har meldeplikt. Det betyr at om du fortel noko som kan vere til skade for deg sjølv eller mennesker rundt deg, så må ungdomskontakten gå videre med dette. Dette skjer ikkje utan at ungdomskontakten informerer deg om dette.

Konsultasjon, rettleiing og undervisning til samarbeidspartar

Hjelp til å finne fram til andre aktuelle tenester og tilbod

Individuell jobbstøtte (IPS Sunnfjord)

IPS er eit tilbod til personar over 16 år, som har psykiske utfordringar eller rusproblem og får behandling i Barn, unge og familiestøtte (BUFA). Du må ha eit ønske om å jobbe eller kome i utdanning for å delta i IPS.
IPS er eit samarbeid mellom NAV og helstenesta. Du får tilpassa hjelp ut frå interessene og jobb- og/ eller utdanningsønska dine.

Ein jobbspesialist, som er ein del av behandlingsteamet ditt, følger deg opp i samarbeid med behandlaren din. Målet er å hjelpe deg med å kome ut i jobb eller utdanning, og følge deg opp etter at du har starta i jobben eller begynt på utdanninga.