Gode relasjonar mellom barn og vaksne, og barna imellom er grunnlaget for eit trygt og godt psykososialt miljø. 

Vi skal:

• møte barna med smil, omtanke og positiv merksemd kvar dag når dei kjem til barnehagen
• syne kvart barn at vi er glade for å vere saman med dei, og støtte barna i å utvikle positiv sjølvkjensle
• vere nær barna, leike med dei, gje dei eit fang å sitte på, og bruke humor og glede  
• passe på at barna har det trygt, og gje dei hjelp og støtte
• anerkjenne barna sine kjensler, trøyste og gje hjelp til å regulere kjensler 
• hjelpe barna å bli godt kjende med kvarandre, danne gode relasjonar til andre barn og få delta i leik (sjå meir om dette under “Å høyre til”)
• vere i positiv samtale med kvart barn kvar dag
• prøve å tolke barna sine uttrykk, lytte til barna sine ynskjer og gje dei medverknad innanfor trygge rammer
• legge til rette for at barna opplever meistring, og utvikle tru på seg sjølv 
• seie «ha-det» og tar avskjed på ein positiv måte med kvart barn når dei går heim frå barnehagen

Vi gjer bevisste vurderingar når barn blir plassert i avdelingar og grupper.  Samansetninga av avdelingar og grupper skal danne best mogleg føresetnad for god gruppedynamikk og gode relasjonar. 

Barna kan oppleve fleire former for endring knytt til relasjonar og struktur i barnehagen, som

• å begynne på ny avdeling
• å få nye barn inn i avdelinga si
• at barn på avdelinga sluttar
• endringar i personalet på avdelinga

Vi skal ha gode rutinar for tilvenningstida slik at barna meistrar overgangane, og får ei trygg tilvenning. 

Barn som begynnar i barnehagen får ein vaksen som sin primærkontakt.

Primærkontakten har særleg ansvar for å følge opp barn og foreldre, og å sikre at barna får positive kontaktar kvar dag gjennom barnehagetida. Rolla er viktigast i tilvenningstida.