Bakgrunn for saka
20. juni 2024 gjorde kommunestyret i Sunnfjord kommune vedtak om at arbeidet med å bygge ut Sunnfjord Næringspark K2-K4 held fram med utgangspunkt i anbodskonkurranse i mai 2024 og vurderingar i saksutgreing datert 09.06.2024.
Sjå film som viser parken ferdig utbygd
Status i Sunnfjord næringspark i dag
K2 og K3 er reservert for verksemder med større arealbehov medan ein har tenkt mindre tomtar i K4. Det er stor interesse for å etablere seg i næringsparken. Interessa er særleg stor for areal i K2 og K3.
Sunnfjord Miljøverk har fått lovnad på ca 50 dekar lengst aust i K3.
To firma som ønsker å etablere datasenter har opsjon på to tomtar på 30 og 40 dekar i K3 og K2. Interessa for areal til datasenter er særleg stor, og ytterlegare 4-5 datasenterverksemder ønsker å etablere seg på Moskog.
Fleire lokale verksemder med arealbehov har òg meldt si interesse.
Detaljreguleringsplan for K2-K4
Når detaljreguleringsplanen for K2-K4 er vedteken, blir det lagt opp til å tildele tomter og signere kjøpekontraktar.
Energiplan
Sunnfjord kommune har fått 500.000 kr frå Vestland fylkeskommune for å utarbeide ein energiplan for Sunnfjord næringspark. Planen vert lagt fram for politisk handsaming som eiga sak.
Finansiering av restarbeid i K2-K4
For å unngå at kommunen si betalingsevne blir svekka, så tilrår kommunedirektøren at vidare utbygging av næringsparken blir finansiert gjennom eit byggelån med ei ramme på inntil 200 mill. kroner i 2026. Inntekter frå sal av næringstomter skal bli brukt til nedbetaling av byggelånet.
Renteutgifter i byggeperioden blir belasta prosjektet og vil difor ikkje påverke driftsrekneskapen før prosjektet er avslutta.
Utbygginga vil i ein periode gi kommunen auka lånegjeld. I den perioden vil driftsrekneskapen bli påverka gjennom høgare minimumsavdrag. Eit byggelån på 200 mill. kroner vil kunne auke minimumsavdraget med om lag 5 mill. kroner i påfølgjande år. I gjeldande økonomi- og handlingsplan er det allereie budsjettert med om lag 3 mill. kroner meir i avdrag enn minimumskravet, noko som vil dekke delar av auken på 5. mill.
Tiltaket er vurdert å ha god samfunnsøkonomisk nytte på lang sikt, gjennom etablering av nye arbeidsplassar og framtidige inntekter til kommunen.
Framlegg til vedtak frå formannskapet i møte 12. februar
- Til ferdigstilling av felta K2, K3, K4 og rekkefølgekrav i Sunnfjord Næringspark , vert det løyvd kr 178.650.000 i samsvar med saksutgreiing datert 03.02.2026.
- Budsjett og økonomiplan blir endra i samsvar med tabellen under.
- Utbygginga blir finansiert med eit byggelån på inntil 200 mill. kroner i 2026, jf. kommunelova § 14-15 første ledd. Lånet blir betalt ned i takt med sal av tomtar.
- Ev. bygging av internt fjernvarmenett blir lyst ut som ein opsjon i entreprisen for bygging av intern infrastruktur i Sunnfjord Næringspark. Før opsjonen ev. blir gjort gjeldande skal det leggast fram ei sak for politisk handsaming.
Kommunedirektøren si vurdering
I denne saka tilrår kommunedirektøren å restfinansiere utbygginga av felta K2-K4 i Sunnfjord Næringspark. Prosjektet må netto tilførast ca 166 mill kr slik at dei totale prosjektkostnadane vil bli ca 307 mill kr. Alle utbyggingskostnadane inkl. anleggsbidrag til VA-leidningen frå Kusslid til Moskog og kommunen sin del av kostnaden med omlegging av krysset på E39 blir dekka av tomtesal.
Sunnfjord kommune tar med denne utbygginga eit stort ansvar og økonomisk løft for å legge til rette for næringsutvikling i Sunnfjord. Målet er å skape eit næringsområde med gode miljøkvalitetar, og som vil stette behov for tomteareal både for lokale bedrifter og eksterne aktørar. Utbygginga er krevjande og kommunen tar i dette arbeidet ein betydeleg risiko. Men kommunedirektøren har tru på at næringsområdet på Moskog vil vere attraktivt og framtidsretta ettersom området ligg strategisk til ved E39 – midt mellom Bergen og Ålesund - og med svært god tilgang til elektrisk og digital infrastruktur.