Sunnfjord kommune samlar Nome kommune, industri, direktorat, stat og fylkeskommune i Førde 8. april for å drøfte erfaringar og samarbeid knytt til utviklinga av ei moderne og berekraftig mineralnæring i Noreg.

Med erfaringar frå mellom anna Engebøprosjektet i Sunnfjord og Fensfeltet i Telemark på agendaen, ønskjer kommunen å leggje til rette for meir kunnskapsdeling, betre prosessar og større lokal verdiskaping. Med på møte deltek direktør for Direktoratet for mineralforvaltning, Nordic Mining og fylkeskommunen saman med Nome kommune.

– Kommunane står tett på både lokalsamfunna, arealbruken og industrien sine behov. Skal vi lukkast med ei berekraftig mineralnæring, må vi ha god dialog og felles forståing mellom kommunar, næring og stat, seier ordførar i Sunnfjord kommune, Jenny Følling.

Møtet blir halde på rådhuset i Førde og samlar deltakarar frå fleire kommunar, næringslivet og statlege styresmakter.