Kommunebarometeret er ikkje noko fasit på kvaliteten i kommunale tenester, men gir eit bilde på kor Sunnfjord kommune står samanlikna med andre kommunar.

Veldig gledeleg plassering for Sunnfjord kommune med det vi står opp i av innsparing og omstilling!

Ordførar og kommunedirektør vil rette ein stor takk til alle tilsette for det gode arbeidet som vert gjort.

På sektornivå er det svært god plassering på grunnskule og klima/miljø med 10. plass og barnehage med 27. plass.

Sunnfjord kommune er på 42. plass i Noreg totalt sett.

Kommune barometeret 2026 (PDF, 3 MB)

Grunnskule utgjer 20 prosent av den samla vektinga og byggjer på 19 nøkkeltal.

Karakterane på 10. trinn i Sunnfjord låg i fjor på 43,53 grunnskulepoeng, over landssnittet. Delen elevar på lågaste meistringsnivå på nasjonale prøver ligg lågare enn gjennomsnittet, særleg på ungdomstrinnet.

86,44 prosent av lærarane på barnetrinnet og 88,15 prosent på ungdomstrinnet oppfyller kompetansekrava i norsk, engelsk og matematikk.

Delen elevar med spesialundervisning i Sunnfjord er lågare enn landssnittet på alle trinn.

Sektoren tel 5 prosent av den samla vektinga og omfattar 15 nøkkeltal.

Kommunane har ei sentral rolle i arbeidet med både klima- og naturkrisa. Klimagassutsleppa i Sunnfjord er reduserte med 8,99 prosent dei siste fire åra.

Auke i utbygd areal har vore låg, men noko jordbruksareal er omdisponert. Kommunen får utteljing for klimavennlege tiltak, naturforvaltning og oppdaterte planar på klima- og naturområdet.

Barnehage utgjer 10 prosent av den samla vektinga og bygger på 13 nøkkeltal.

Bemanninga i kommunale barnehagar i Sunnfjord var 5,9 barn per vaksen i fjor, noko som er litt høgare enn landssnittet. I private barnehagar var talet 5,4 barn per vaksen.

82,4 prosent av dei kommunale barnehagane oppfyller pedagognorma utan dispensasjon, og 47 prosent av dei tilsette har pedagogisk utdanning. Delen menn i barnehagane er 15,1 prosent, over landssnittet.

Nesten alle barn i Sunnfjord har barnehageplass, og delen barn med minoritetsbakgrunn i barnehage er høg samanlikna med landet elles.

Sunnfjord har lite midlar på disposisjonsfond. Fondet var i fjor på 0,7 prosent av bruttoinntektene til kommunen. Det er mindre enn i dei fleste andre kommunane i landet.

Investeringsnivået i Sunnfjord var i fjor 12,85 prosent av brutto driftsinntekter i snitt for dei fire siste åra, og dette ligg under landstendensen.