Krav til byggeteikningar og situasjonsplanKrav til teikningar og situasjonsplan ved byggesøknad Generelt Det er viktig at kommunen får teikning av alle dei planlagde endringane/nybygg utforma slik det er enkelt å sjå kva du søker om. Du må sende inn plan-, snitt og fasadeteikningar ved byggesøknaden. Kva du må ha med på teikningane vil variere noko etter kva type tiltak du skal bygge. Nokre gonger kan det vere naudsynt å sende fleire teikningar som til dømes terrengprofil, perspektivteikning og liknande. Teikning som vedlegg til søknad om tiltak bør vere utarbeidd i målestokk 1:100 eller 1:200. Målestokken må bli vurdert ut frå det som er mest teneleg i forhold til storleiken på tiltaket. Teikningar skal vere fagmessig utført, og gje eit korrekt bilete av bygningen/konstruksjonen. Det vil seie at alle strekar skal vere rette, og relevante mål skal vere påført. Når tiltaket gjeld fasadeendring, tilbygg, påbygg og andre endringar til eit opphaveleg bygg, må teikningane tydeleg vise kva som er eksisterande og kva som er nytt. Marker område med farge eller markerte strekar. Følgjande opplysningar skal vere oppgitt i tittelfelt: gnr. og bnr adresse, postnummer, poststad tiltakets art (påbygg, tilbygg, nybygg) teikningsnummer, og revisjonsnummer målestokk, dato og eventuell revisjonsdato signatur Planteikningar På planteikningar skal det gå fram: alle etasjeplan med etasjenummer påført plassering av snitt bygningens yttermål, og yttermål for eksempel tilbygg ytterveggar med riktig tjuknad planløysing - rominndeling som viser kva dei blir brukt til (bad, soverom osv.) separate bueiningar dersom det er fleire Når tiltaket gjeld innvendige endringar i eksisterande bygg, skal du levere planteikning av heile etasjen der endringane skal skje. Marker tydeleg kva endringar du søker om. Søker du om tilbygg skal planteikning vise heile etasjen. Både eksisterande areal og tilbygget. Marker tydeleg kva som er tilbygget du søker om. Fasadeteikningar Fasadeteikning skal vise: Teikning av heile bygget. Ei teikning for kvar fasade med påført himmelretning Bygget sitt eksteriør/arkitektur med utsjånad og materialval Ved tilbygg skal du sende teikning der alle fasadar er synlege. Det må tydeleg gå fram kva som er tilbygget Terrenglinjer som viser eksisterande og framtidig planert terreng Terrenglinjer skal vise høgder etter koter på situasjonskart. Teikn eksisterande og framtidig terreng med forskjellige strekar slik det går tydeleg fram. Der tiltaket er nær eigedomsgrense eller byggegrense skal du vise denne Snitteikningar På snitteikningar skal det gå fram: Innvendige høgder: fri høgde i kvar etasje Utvendige høgder: møne- og gesimshøgde Byggverket si høgdeplassering i meter over havet (kotehøgde). Målsetting frå overkant fundament eller golv Ytterveggar med riktig tjukkleik Tak med riktig tjukkleik og takvinkel Terrengliner som viser eksisterande og framtidig planert terreng. Det skal vise høgder etter koter på situasjonskartet. Teikn eksisterande og framtidig terreng med forskjellige strekar slik det går tydeleg fram. Der tiltaket er nær eigedomsgrense eller byggegrense skal du vise denne Terrengsnitt Nokre gonger vil ikkje høgdeplasseringa av tiltaket bli sett i samanheng med bygningar rundt naboeigedom, veg og liknande. Det kan då vere naudsynt å lage terrengsnitt som tydeleg viser høgdeplasseringa i forhold til omgjevnaden. Terrengprofil skal vise eksisterande og nytt terreng. Perspektivteikning I enkelte saker kan det vere naudsynt å sende perspektivteikning av tiltaket. Dette skal vise tiltaket i forhold til omgjevanden rundt, gjerne som 3D visning. Den erstattar ikkje fasade- og planteikning, men kan illustrere korleis det du skal bygge vil sjå ut. Perspektivteikning er mest aktuelt i byggesøknad for større byggeprosjekt som hus/hytter og liknande. Situasjonsplan Situasjonsplan blir brukt som grunnlag til søknad, og skal ligge ved alle bygge og delesaker. Situasjonsplan blir utarbeid av tiltakshavar eller ansvarleg søkar, og skal vise heile tiltaket nøyaktig innteikna. Det skal vere påført mål og avstandar. Den skal i den grad det er relevant for handsaminga bli påført opplysningar om tiltakets planlagte plassering og minste avstand i forhold til: nabogrense nære bygningar senterlinje veg høgspentlinjer (luftstrekk/kabel) Situasjonsplan skal vidare vise: tilkomst/avkøyrsel areal for parkering og uteopphaldsareal ute takflate fasadeliv møneretning tilknyting til vass og avlaupsnett (kan bli vist på eigen søknad om tilknyting) Sist endra 06.07.2022 12.49